السلام عليكم ورحمة الله وبركاته
مساء الخير
اقدم لكم قصيده للشاعر عبدالعزيز السليس قصيده اعجبتني جدا
فاليكم القصيدة
ياربعي اللي تهتوون المطاريش <><> معكم يبيلي بأول الصبح مغباش
فرصة وأدورها بروس المناقيش <><> راسي من التفكير والهم منداش
والله ما ادري ليش والا على ويش <><> لكن صدري من عنى خاطري طاش
تكفون لا نامت عيون الخفافيش <><> ودي بمطراشٍ ماهوب أي مطراش
على أبيضٍ من جدّته مابعد نيش <><> ومن زود قدره سايقٍ قيمته كاش
وإذا فهقنا جوّ عقب التفاتيش <><> ثم جاتنا لوحة جفن ضب ومشاش
سوقوه لديار الرجال المداغيش <><> أمثال أبو ماجد وفالح وعكّاش
يفداهم اللي يلبسون الطرابيش <><> ويفداهم الهلفوت والنزل واللاش
هم شوق من تزهاه سود العكاريش <><> كم واحدٍ في ظلهم بالهنا عاش
نبي نسج الرجل في الخبت ونعيش <><> ساعات نقضيها طرب بين الأدباش
في عبلةٍ فيها الخزامي مداقيش <><> والجو غايم برق مع رعد وارشاش
تبري الكبود الظاميات المعاطيش <><> شوف الخزامى والنفل يبرد الجاش
راس الظبي قد قيل مابه عراميش <><> لكن نعيش العمر غربة ونعتاش
هو ليش مانقنع من الوقت هو ليش ؟ <><> وقتٍ سعينا به ولكن على ماش
ودام المهبل في عماهم مخاييش <><> وإذا لفا واحدهم العلم ينحاش
خلوني أحيا باقي العمر واعيش <><> بين الصحاري والفيافي والادباش
تقبلو خالص التحايا
ليست هناك تعليقات:
إرسال تعليق